اروع الابوذيات من عاشق الصداقة

بقامته
انسحر قلبي بطوله وبقامته
ولشوكت احبك انا وابقى مته
اتمنى انضرب بيدينه وبقامته
ولاغيره يمد ايده عليه

وي روح
احط لقليبي اجناحات وي روح
الك يحمل رسائل عتب وي روح
صفن وسط الجسد روحين وي روح
نعيش العمر يمدلل سويه

شفته
العمر بدا من يوم شفتك
وجريت النفس بس بست شفتك
يقلي القلب فكني وقلت شف تك
بعصارة اميري ولزك بيه

يدمن
عيون القلب يوم اجفاك يدمن
عفتني وصافحت ياترف يدمن
انا ال مثلي على الحسبات يدمن
عسى أنسا هواك شعمل بيه

قلب صديقك لو مشى وياك قلبه
وعوف ألحجي وشوف اشضام قلبه
مثل قلبه لو يختلف قلبه
أشوفه ابيض وهو اسود النيه

اكتبلي شما ردت تكتب وارد لك
وازعل وابتعد عنك و ارد لك
بساتين بوسط كلبي وردلك
وشما تبتعد عني تظل غالي عليه



مكانك حبيبي وبالقلب انت مكانك
وقلي ياهو اليجي وياخذ مكانك
اذا اني تهت صرت يمك يم مكانك
واذا انت تهت صرت ابين اديه
كتاباتي
قلبي حيل طيب وتوصفني جسر
قلتلها احبج انا وكالتلي انت جسر
رجف قلبي من شفتها تمشي ع جسر
واحس وافتني ساعتها المنية

سفينة موج من تجـبل صدرها
ويا حيف الزمن روحي صدرها
بـيهـا انهـود لَـنْ يلـمع صدرها
شبه رمان للمهجة شـهيّه ....

ابــتـــاج الفرح ولفي توجاني
وحسن رَدْ لي شبابي توجاني
مـن أثـمار الـمـــحبه توجـاني
قلبي الشبع ضيم امن الأذية

شربت الجاي مرمر بستكانه
ولا ظلّيت قاعد بستكانه
وخمس ... عشرين يسمر بستكانه
ولا أشبع إذا أوصل الميّه

لو مرّيت لقعد بستكانه
وشاي الحب صبْ لي بستكانه
تسع مرّات يسمر بستكانه
ولي وحده بقت يم الشفيّه

أنا واحد ولي عدوان مايا
ولي ناظر يهل الدمع مايا
عزيز الروح ودّعني و مايا
وخلّاني أون صبح ومسيّه

أنا ابخـــــير إن لفا يمّــي ونــــعمة
واشوف ادروبي تضحك لي وانا اعمى
يقلبـــي خفضّـه الــــــ نبــضــــك ونعمه
عســى هــــــو خلـّي يتــحنـــن علـــيـّه

اظل ناعور الك اترس وكت ماي
ويظل حبك يمرمرني وكتماي
تدري شوكت امل منك وكت ما
يموت القلب وندفنه سويه

القلب معلول مايشفه منشفاه
وعلى اخدودي الدمع جاري منشفاه
على الراح وحرم شفتي من شفاه
وكطع حتى بحلم مامر عليه

قبل مايون قلبك ونته بيه
شلون اتريد اعوفك وانته بيه
ولك قلبي انت امه وانت بيه
ويتيم ايصير اذا رحت من اديه



عيونك تشبه الطاووس واكبر
ومن شفتك صحت الله واكبر
اخاف يلوح بيه الشيب واكبر
وتنساني بعد وشلون بيه

سالت الناس عنك وأنته هينه
وعلى فراكك تلفنه ونتهينه
هاك القلب عذبه وانته هينه
ويظل اسمك حلو وغالي عليه

زمانك لو زعل وياك خله
واسكت لاتبين بيك خله
مو سهله الخليل يعوف خله
بس صعبه الكرامه اتموت بيه

قدر مكتوب حبك منت قسمه
الواحد ماله ناتج من تقسمه
لون بسيوف كلبي من تقسمه
تشوف محبتك شمسويه بيه

هوينه وغير وشخصك ما هوينه
عليك العين تسال ما هو وينه
امد ايدي على كلبي ماهو وينه
اذا عندك دخيلك رده الينه

حنانك ما وصل مرة لحناني
قسه قلبك كسر هجرك حناني
إذا شموع الفرح يمك حناني
الشموع تذوب وجفوفك بدية

احبك ياحلو من يوم شفتك
ومعجب أني بعيونك و شفتك
وأريد أبوسك من حلكَك و شفتك
واحظنك دوم بثنين أديه

كل مغرم برت علتـــه وناله
سعيد اللي حظه بشخصك وناله
الطارش من سمع نوحـي وناله
ترك شغله وبجه رحمــه عليه

كتلني منك عيون شلون بحـسنهن
بهذلن الحال بسهام وحســـــــــنهن
نظراتي ألك كل الحديثات حسنهن
بس أنت ما حاس بيه

يدنيه بلوعي وشكواي ... حسي
وعن وجهي غبار الضيم ... حسي
اريد اصرخ وصيح بعلو ... حسي
لما تحسين يادنياي بيه

عشكت يـــــــــــــا هالناس مرة
وهجرة عاف بقـــــــــــــبلي مرة
شكثر على القلب حديثات مارة
و انت ابد ما مريت بية

كذب من قال لن روحي تملّك
وعلى نبض القلب سيطر تملّك
رجاها الروح من مايك تملّك
يماي الشهد لا تبخل عليّه

دكلي شلون ماحبك ولا ابيك
امك ماتحن مثلي ولا بيك
عساهن بيه لوعاتك ولا بيك
ويديرن كل الم منك اليه

احباب واعز من صحتي صحتهم
جفوني ولا ضمايرهم صحتهم
بديه كمت وبلساني صحتهم
سمعو شافو ولا فزعو اليه

حبي الك مافد يوم ينكص
وليش الصاحب من يغيب ينكص
زمن خله الحديد بخشب ينكص
ويخلي الماله اول بالثنيه

ليــاليــكم صـدق صــعـــود ونــزول
وحبـكم بـات في روحي بلا نـــزول
وحق اللي رسل لمطار بنــــــزول
ذكـّركم كـل وقـت يلفــي علــــــيّ

الهجر يكتل ياصاحب وانت داري
عليك يخاف كلبي وانت داري
انت اهلي وعمامي وانت داري
انت امي وابوي واخ الي

حبيبي شلون حالك وصفة ليه
وعوف الناس كلها واصفا ليه
مريض اني وصرت انت وصفه ليه
ومن اشوفك كل مرض مايبقى بية

زمانك اسف بل احزان خلك
وتلقى اسهام من ايدين خلك
اذا راضي على هالحال خلك
عليه العافية وناره عليه

وزني
نعلت الله على على الشيطان وزني
ثقيل وخفف المنعول وزني
وزنتج ذهب صافي ونقص وزني
غشيم اورطت روحي بديه

واشتم
اكطع من خدودك ورد واشتم
ولاادري شبقا من العمر واش تم
مرخص سبني كل ماردت واشتم
شتايكم ثواب ال والديه

شجاني
زرعت الطيب بديارك شجاني
بس هم والم منك شجاني
والك شمسوي يمدلل وشجاني
حتى تزرع بدربي الاذيه

الله يعطيك الف عافيى


سلمت يمناك على الطرح الرااائع

عاشت الايدي على هذه الكلمات الرائعة

شكرا على هذا الموضوع

مشـــكـــور ع الابوذيـــات الحلـــوة منتظريــن جديدك ...... تحيـــاتي